Seksualitehta lea miellagiddevaš fáddá ja seammás dan birra sáhttá leat váttis ráhpasit hállat. Sire ja Jusse leaba guokte nuora geat jurddašeaba ollu justa dáid áššiid ja geahččaleaba oahppat ja áddet seksualitehta. Sudno čalmmiid čađa don beasat dán girjjis oaidnit veahá sudno hástalusaid ja dat soaitá boktit dus beroštumi oahppat vel eambbo seksualitehta birra.
Sihke skuvllas, ruovttus, medijain ja servodagas muđui leat ollu dieđut ja ollu hupmu seksualitehta birra. Fáktádieđuid ii leat váttis háhkat. Váddáset soaitá leat smiehttat iežas guottuid, oaiviliid, rájiid ja árvvuid birra.
Soaittat álgán iskat dahje hálidat iskat iežat seksualitehta eambbo – okto iskat, nuppiin olbmuin iskat. Movt dieđát goas leat liikostan nubbái ja mii lea ráhkisvuohta? Liikostat go nieiddaide vai bártniide? Manne lea dehálaš iežas gorudin oahpasmuvvat? Movt galgá duosttat lahkonaddat nuppi olbmo? Movt sáhttá leat go nubbi ii beroš du rájiin?
Girji govvida sihke positiiva ja negatiiva seksuála vásáhusaid, lea dehálaš diehtit veahá buot beliin seksualitehtas go olmmoš lea rávásmuvvamin, nu go don leat! Lihkku lohkamin!
